लुम्बिनी प्रदेशमा डेंगीका बिरामीको संख्या बृद्धी

सेयर गर्नुहोस्
33Shares

बुटवल । पछिल्लो तीन साता यता कपिलवस्तु सहित लुम्बिनी प्रदेशका विभिन्न अस्पतालमा डेंगी रोगका बिरामीको संख्या बढेको छ । अझ साउन लागेसँगै बुटवल स्थित लुम्बिनी प्रादेशिक अस्पतालमा डेंगीका बिरामी बढ्दै गएका छन् ।

असारदेखि नै डेंगीका बिरामी अस्पतालमा आउने गरेकोमा साउन लागेपछि भने दैनिक १५÷१६ जनामा डेंगीको संक्रमण देखिएको लुम्बिनी प्रादेशिक अस्पताल बुटवलले जनाएको छ । अस्पतालका मेडिकल सुपरिटेन्डेन्ट डा.इन्द्र ढकालले असारमा फाट्टफुट्ट बिरामी आउने गरे पनि साउन लागेपछि भने बिरामी थपिने क्रम बढिरहेको बताए ।

अस्पतालका अनुसार विगतका वर्षमा साउन र भदौमा डेंगीका बिरामी आउने गरेकोमा यसवर्ष भने असारदेखि नै बिरामी आउने गरेकोले भदौसम्म बिरामीको संख्या धेरै थपिन सक्ने खतरा देखिएको छ । मेडिकल सुपरिटेन्डेन्ट डा. ढकालले दुई वर्ष पहिले स्वास्थ्य कार्यालय र स्थानीय तहहरूले विभिन्न सचेतनाका कार्यक्रमसँगै लामखुट्टे खोज र नष्ट गर अभियान सञ्चालन गरे पनि यसवर्ष त्यो अभियान शून्य हुँदा बिरामी बढेको हुन सक्ने बताए ।

यता कपिलवस्तु जिल्लामा हाल केही व्यक्तिमा मात्रै डेंगि रोग पुष्टि हुने गरेको जिल्ला अस्पताल तौलिहवाका मेडिकल सुपरिटेन्डेन डा. किशोर बञ्जाडेले बताए । कपिलवस्तुमा डेंगीको ठूलो असर यसवर्ष नदेखिए पनि जोखिम भने रहेको उनको भनाइ छ ।

डेंगी लाग्नबाट जोगिने एक मात्र उपाय लामखुट्टेको टोकाइबाट जोगिनु भएकोले लामखुट्टेको बासस्थानको खोजी गरी नष्ट गर्नुपर्ने चिकित्सकहरुको सुझाव छ ।

लुम्बिनी प्रादेशिक अस्पतालका सूचना अधिकारी डा. नेत्र रानाका अनुसार लुम्बिनी प्रादेशिक अस्पतालमा मात्रै दैनिक १५÷१६ जनासम्म डेंगीका बिरामी थपिने गरेकोले ज्वरो आयो भने पनि सामान्य ज्वरो होला भनी घरमै नबस्न सुझाव दिन्छन् ।

डेंगीको संक्रमण अलि गम्भीर देखिएको, बान्ता हुने, खाना खान नसक्ने, रगतमा प्लेट्लेट्स घटेको जस्ता बिरामीलाई भने अस्पतालमै भर्ना गरेर उपचार गरिएको डा. रानाले जानकारी दिए ।

प्रतिकृया दिनुहोस्

साझाकुरा मिडिया ग्रुप प्रा.लि द्धारा संचालित www.esajhakura.com का लागि तपाईको केही प्रतिक्रिया भए माथिको Comment Box मा आफ्नो अमुल्य प्रतिक्रिया दिनुहोला । हामीसँग तपाईं Facebook, TwitterYouTube मा पनि जोडिन सक्नुहुन्छ ।

प्रतिकृया दिनुहोस्

Please enter your comment!
Please enter your name here