एमालेले माग्यो लेखा समितिको सभापतिको राजीनामा

सेयर गर्नुहोस्
12Shares

काठमाडौं

प्रमुख प्रतिपक्ष नेकपा एमालेले सार्वजनिक लेखा समितिको सभापतिमा दावी गरेको छ ।

२०७४ को आम चुनावपछि प्रमुख प्रतिपक्षी दलको हैसियतमै कांग्रेसले यो समितिको सभापति पाएको थियो, भरतकुमार शाह सभापति छन् । तर अहिले कांग्रेसले गठबन्धन सरकारको नेतृत्व गरिरहेको छ भने एमाले प्रमुख प्रतिपक्षीको भूमिकामा छ ।

समितिको आइतबार बसेको बैठकमा एमाले सांसदद्वय गोकुल बास्कोटा र राजेन्द्रप्रसाद गौतमले संसदीय परम्परा र नेपालको अभ्यास अनुसार पनि लेखा समितिका सभापति प्रमुख प्रतिपक्षले पाउनुपर्ने बताएका हुन् । सांसद बास्कोटाले लोकतन्त्रको सुन्दर पक्षको कदर गर्दै समितिका सभापति शाहले राजीनामा दिनुपर्ने बताए ।

अर्का सांसद गौतमले पनि संसदीय विधि, अभ्यास र परम्परालाई प्रभावकारी बनाउने हो भने सार्वजनिक लेखा समितिको सभापति प्रमुख प्रतिपक्ष दलले पाउनुपर्ने बताए । सरकारलाई चेक एण्ड ब्यालेन्स गर्ने ठाउँ समिति भएको भन्दै उनले भने, ‘यसको अगुवाई र नेतृत्व प्रमुख प्रतिपक्षले गर्नुपर्छ ।’

लेखा समितिका सभापति शाहले भने यसबारे आफूले धेरै बोल्न नचाहेको प्रतिक्रिया दिएका छन् । विगतमा लेखा समितिको सभापतिले राजीनामा दिएको आफूलाई थाहा नभएको भन्दै उनले भने, ‘यो विषयको उठान गर्नु विपक्षको धर्म हो । यसले प्रजातन्त्र सुदृढ हुन्छ । उहाँहरुलाई धन्यवाद दिन चाहन्छु ।’

प्रतिकृया दिनुहोस्

साझाकुरा मिडिया ग्रुप प्रा.लि द्धारा संचालित www.esajhakura.com का लागि तपाईको केही प्रतिक्रिया भए माथिको Comment Box मा आफ्नो अमुल्य प्रतिक्रिया दिनुहोला । हामीसँग तपाईं Facebook, TwitterYouTube मा पनि जोडिन सक्नुहुन्छ ।

पछील्लो पोस्ट पहिलो पटक टी–२० विश्व कपमा ‘डीआरएस’ को प्रयोग हुने
अगिल्लो पोस्ट नेपाल स्काउट लुम्विनी प्रदेशद्धारा पोसाक वितरण