विज्ञको प्रधानमन्त्रीलाई सुझाव , २ हप्ता लकडाउन

सेयर गर्नुहोस्
39Shares

काठमाण्डाै उपत्यकासहित देशभरि नै कोरोना भाइरसको सङ्क्रमणदर बढ्न थालेपछि प्रधानमन्त्री केपी शर्मा ओलीले जनस्वास्थ्य विज्ञ र सरोकारवालाहरुसँग छलफल गर्नुभएको छ ।

प्रधानमन्त्रीको सरकारी निवास बालुवाटारमा भएको छलफलमा विज्ञहरुले दुई हप्ता लकडाउन बढाउनेदेखि कर्फ्यु लगाउनुपर्नेसम्मका सुझाव दिएका छन् । जनस्वास्थ्य विज्ञ डाक्टर रवीन्द्र पाण्डेले समुदायस्तरमै एक व्यक्तिबाट अर्को व्यक्तिमा सङ्क्रमण फैलिने दर बढेकाले १५ दिन कडा खालको लकडाउन गर्नुपर्ने सुझाव प्रधानमन्त्रीलाई दिइएको बताउनुभयो ।

सुरुमा भारतलगायत तेस्रो देशबाट आउनेहरुमा सङ्क्रमण देखिने गरेकोमा पछिल्लो समय नेपालमै बस्ने एक व्यक्तिबाट अर्को व्यक्तिमा सङ्क्रमण फैलिरहेकाले १५ दिन कडा लकडाउन गरी स्वास्थ्य सुरक्षाका मापदण्ड कडाइका साथ अपनाउने गरी अगाडि बढ्नुपर्ने पाण्डेले बताउनुभयाे ।

केही विज्ञहरुले भने लकडाउन मात्रै महामारी नियन्त्रणको एकमात्रै उपाय नभएकोले सङ्क्रमण देखिएका निश्चित ठाउँहरु सिल गरी सीमा नाकामा कडाइ गर्नुपर्ने सुझाव दिएका छन् ।

अर्का जनस्वास्थ्यविज्ञ डाक्टर समीरमणि दीक्षितले लकडाउन गरेर कोरोना पूर्णरुपमा नियन्त्रणमा नआउने भएकाले बढी सङ्क्रमण फैलिएको क्षेत्रमा कडाइ गर्नुपर्ने सुझाव प्रधानमन्त्रीलाई दिइएको बताउनुभयो । स्वास्थ्य सुरक्षाका मापदण्ड नअपनाए अवस्था भयावह हुने उल्लेख गर्दै उहाँले सबैका सल्लाह सुझावअनुसार प्रधानमन्त्रीले उचित निर्णय लिने विश्वास व्यक्त गर्नुभयो ।

नेताहरु शेरबहादुर देउवा, महन्थ ठाकुर, राष्ट्रिय योजना आयोगका पूर्वउपाध्यक्ष लगायत जनस्वास्थ्य विज्ञ सहभागी छलफलपछि प्रधानमन्त्री ओलीले सुझावहरु कार्यान्वयन प्रक्रियामा लैजाने बताउनुभयो ।

प्रधानमन्त्रिका प्रेस सल्लाहका सूर्य थापाका अनुसार स्वास्थ्य मन्त्रालय, सीसीएमसी र मन्त्रिपरिषदमा छलफल गरेर ठाेस कदम चाल्ने प्रधानमन्त्रीले प्रतिबद्धता व्यक्त गर्नुभएको छ ।

अन्तिम अपडेट: साउन २०, २०७७

प्रतिकृया दिनुहोस्

साझाकुरा मिडिया ग्रुप प्रा.लि द्धारा संचालित www.esajhakura.com का लागि तपाईको केही प्रतिक्रिया भए माथिको Comment Box मा आफ्नो अमुल्य प्रतिक्रिया दिनुहोला । हामीसँग तपाईं Facebook, TwitterYouTube मा पनि जोडिन सक्नुहुन्छ ।

पछील्लो पोस्ट लुम्बिनी प्रादेशिक अस्पतालमा उपचार गरेका कपिलवस्तुका एक जनालाई कोरोना
अगिल्लो पोस्ट काठमाण्डाैमा ४८ सहित उपत्यकामा थप ६२ जनामा कोरोना सङ्क्रमण